Red Double Sketch Heart

Pages

Sunday, June 19, 2016

19/6 ♥



19/6/2011
- ساعات بحس إنك بتحبني بصرقاتك دي بس بقول أكيد إنت كدا مع أي حد
- بس أنتي مش أي حد وأنا عمرى ما عملت كدا مع حد أصلا
- انت قولت هتخليك ومش هتمشي صح
- هو ينفع تتجوزيني


19/6/2016
- أنت بجد حقيقي
- أيوة أكيد بجد يعني
- وحشتنى أوى

لسه بحبك بكل المشاعر الطفولية بتاعت الأول، يمكن البدايات بتكون أحلى من أي وقت تانى
بس متخيل إن بعد 6 سنين لسه كل حاجة بتحصل بينا هى "أول مرة" كل يوم معاك بداية 
كان نفسي جدا أسمع صوتك النهاردة بالذات اليوم اللى ارتبطنا فيه اللى هو بداية كل البدايات
وكان نفسي أشوفك جدا بس هتصدق إن صوتك ردلي روحي 
ومن وقت ما قولت انك خلاص جاى ان شاء الله وانا عمالة ألف في الشقة وعملت أكل
مش مصدقة نفسي بجد خلاص هتيجى البيت نفسه مشاقلك جدا 
أوعدنى متبعدش كدا تانى مش تسيبني أبقي لوحدي تانى 
وعقبال السنة المية كدا إن شاء الله وبردو تبقي التدوينة الأساسية لـ 19/6 في مدونتك :))
ربنا يخليك ليا وأحبك كل سنة أكتر وتحبني أكتر من كل سنة بتعدي

Monday, March 21, 2016

بتحامي فيك




هو أنت عارف كلامك بيعمل فيا ايه... لا بجد عارف
أصلا لما بشوفك بسكت مش بلاقي كلام يوصفلك أي حاجة 
مهو انا مش هقدر اقولك قد ايه بعدك كسرني 
ولا أشكيلك حاجة من اللى حصلت معايا 
حتى مش هقدر أعبرلك عن قد ايه واحشنى 
بس نظرتك ليا بتطبطب عليا كلامك بيجبر بخاطري
ربنا يريح قلبك ويجبر خاطرك ويباركلي فيك يارب :*
طيب هو واصلك أنا فرحانة بيك قد ايه متخيل مبهورة بيك ازاي
اوقات بكون مش مصدقة ان ده حقيقي وان اللى بيتكلم ده أنت
هو انا كنت احلم انك تكلمني عن رسايل ربنا عن اليقين عن التسليم 
متخيل انك استجابة ربنا لدعايا 
صدقتنى لما كنت بقولك ربنا بيحبك اوي وعايزك تقربله وبيهيألك الفرص 
الحمد لله يا حبيبى أنت تستاهل كل الخير اللى فى الدنيا
ولو كل اللى حصل معايا ده اشتراك معاك في محنة فأنا راضية ومبسوطة
والله مبسوطة كل الاهانة اللى شفتها بتهون قدام طبطبتك عليا
كل الوجع والعياط بيتنسى وأنت بتقولى بدعيلك 
كل الخوف من اللى جاى بيضيع وأنت بتطمني بيقينك وبقربك من ربنا
ربنا يجمعنا على خير يارب ويحفظك ويخليك ليا سند وحبيب وزوج دنيا وجنة يارب

Monday, February 1, 2016

توثيق




عن كمية الوجع والتعب والبكاء من امبارح ولحد النهاردة 
عن المشاعر اللى عكس بعضها واللى الظروف أقوى منها
عن أن مناسبتنا الخاصة جاية في الوقت الغلط تماما
عن زعلنى منك اللى راح تماما في كلمتين طبطبة على قلبي
وعن حاجات كتير اوى مش عارفة اقول عنها ايه
ختمة القرآن يوم عيد ميلادك ودعائي ليك اعتبره هدية السنة دي
أو كتابي والاهداء ومجموعة الكتب والشيكولاته يمشوا هدية بردو
كل سنة وأنت طيب وكل لحظة وأنت بتضحك حتى لو لمجرد انك ترضيني
كل ثانية وأنا بحبك أكتر وأقوى 
والسنة الجاية إن شاء الله نفضل نفتكر الايام دي وقد ايه كنا متماسكين 
ونفضل ندعي ربنا ما يرجعها تانى
 وتفضل تقولى أنتى قوية وأفضل أقولك بحبك قد الجنة 
كل سنة وأنت ليا أبويا وأبني وحبيبي وجوزي وكل حاجة ليا في الدنيا 
وتفضل قوتي وسنّدي وأفضل قوتك وسنّدك بردو :D
مش عرفت اكتبلك على الفيس حاجة والله ما عندي طاقة اصلا 
بس عارفة ان بوستات المدونات مهمة بالنسبالك فكان لازم أكتبلك هنا
ربنا يباركلي فيك يارب ويحفظلي قلبك والفترة دى تعدي على خير يارب 
وترجع تنور بيتك وتنورلي حياتي وتنور الدنيا بضحكتك الحلوة 
وزي ما قولتلك قبل كدا ده مجرد توثيق لليوم مش احتفال 
نعدي المحنة دى على خير يارب وأنا هعملك سلسلة احتفالات بإذن الله ^_^
كل يوم احتفال عيد ميلادى وعيد الحب وعيد جوازنا وعيد ميلادك وعيد الحب تانى 
ولكل عيد هدية لا تقلق هجيبلك كمية هدايا هفأجأك إن شاء الله :* 
كل سنة وأنت طيب يا روحي <3

Wednesday, November 4, 2015

فصبر جميل ♥



امبارح حلمت بيك قولتلى أرجعي زى ما عرفتك وحبيتك 
انتى أقوي من أي موقف أو ظروف فين قوتك وعقلك 
فين الاصرار والتحدي وتحويل أي حاجة وحشة لحاجات جميلة 
صحيت متفائلة جدا صوتك أصلا وقوتك بتقوينى 
انت عندك حق نبقي اقوى من الظروف ونحولها لصالحنا مش علينا هو ده "الرضا"
وأنا راضية بقضاء ربنا الحمد لله وقوية بيك على أي ظروف بنمر بيها إن شاء الله
فكرت النهاردة في شوية حاجات تفرحك لما ترجع ان شاء الله
وعماله بفكر في اعمل ايه زي ايام الخطوبة بالظبط
بجمع صور لينا سوا علشان اعمل البوم كبير كله يكون صورنا مع بعض في مناسبات مختلفة
وبفكر اشتريلك هدايا كتير في منهم حاجة خلاص استقريت عليها وحاجة جبتها ولسه الباقي 
ابتديت افكر بإيجابية اكتر بعد كلام صحبتى معايا من يومين ان دي منحة من ربنا لينا 
علشان نقرب من بعض أكتر من الاول كمان مش مجرد محنة بنمر بيها 
ده لما قولتلها على مواقف التخاطر اللى حصلت بينا طول الشهر اللى فات 
حسيت كلامها فعلا واثر فيا جامد ورجعت النهاردة احاول اهتم بشغلى 
عارفة ان ده هيفرحك وانك كل شوية تأكدلى عليه وإن مرتبى هيزيد قريب نفسي بجد مرتبى يزيد
علشان انت على طول بتقولى انتى تستاهلى وده هيحصل وكمان علشان اشتريلك آيباد
مع انى الفترة دى ولا استاهل ولا اي حاجة بشتغل بالعافية والله بحاول اوفق بس الوضع صعب جدا
المهم اني هحاول اتعايش مع ان الموضوع هيطول واننا هنكون بعيد عن بعض لفترة 
واتماسك أكتر واظبط الشغل وكمان افكر ازاى نعوض الفترة دى ان شاء الله واعوضك بحاجات تفرحك
وطبعا مش محتاج اقولك "وراك رجالة" لاني قولتهالك قبل كدا :P
كمان مش محتاج افكرك بجملتك اللى كل شوية بتقولهالى "اصبري واحتسبي" انت كمان اصبر واحتسب
ربنا كريم اووووي وواثقة انه هيعوضنا خير ان شاء الله بس انت قول يارب :*

Thursday, June 19, 2014

عيد حبنا



السنة اللى فاتت عملتلك هدية كنت بجهزلها من قبلها بفترة 
وهى كتاب ورق ملون 
السنة دى مش عرفت افرحك بحاجة محددة 
اينعم عملتلك كيكة شيكولاته بس مش شايفه انها هدية يعنى 
فكرت اجيبلك سنفور هدية بس مش نفع
اوقات كتير اوى بفضل افتكر كل اللى حصل ومش بكون مصدقة اننا خلاص اتجوزنا
مش لاقية حاجة اعبرلك بيها عن فرحتى بيك وعن فرحتى بحبنا اللى بيكبر سنة بعد سنة
وعن المواقف الصعبة اللى بتقربنا اكتر لبعض 
وعن كل لحظة حلوة بتربطنا ببعض 
وكل فنتوثانية بحبببببببببك فيها اكتر من اللى قبلها 
ربنا يخليك ليا يااااارب ويقدرنا انى اسعدك يا دودووو

Friday, September 20, 2013

عن ألبوم حبنا




فى يوم وليلة خدنا حلاوة الحب كله فى يوم وليلة 
انا وحبيبى دوبنا عمر الحب كله فى يوم وليلة 
ياللى كان طيفك على بالى وانا بتمناك 
مش هتصدق ايه كان حالى قبل ما القاك 

اه والله اه والله 
مش متخيل انت انا بحبك قد ايه 
اوقات بقول اكيد انا بحلم مش معقول يكون بجد وباقيلنا كام شهر و نبقى سوا ان شاء الله 
طيب متخيل انت اصلا بفضل افتكر واول ما عرفتك 
واضحك لما افتكرك وانت بتقولى هو لو افترضنا مثلا واحد زيى اتقدملك هتوافقى 
احنا اساسا معندناش بنات بتقول لا 
تقولى بس انتى هتكونى مقتنعه و موافقه ولا ايه 
طيب تصدق ان انا كنت عسل هههههههههههه هبلة هبلة يعنى مفيش كلام 
فاكر يوم ما اتقدمتلى وانت قاعد على الكرسى اللى جنبى كدا و اول حاجة قولتها 
يعنى هو احنا المفروض نعمل ايه دلوقتى وانا بمنتهى البراءة قولتلك نتعرف على بعض 
وانت بدمك اللى زى العسل ده قولتلى يعنى تاخدى البطاقة تبصى فيها والكرنيهات وكدا 
وانا بمنتهى البراءة بردو قولتلك اه ورينى و الغريبة بقى انك ورتنى وماما بتبصلنا بذهول ههههههههه
احنا اصلا تصرفاتنا كلها طفولية و اسالتنا عجيبة 
فاكر لما جيت تاخدنى من الكوافير يوم الخطوبة واحنا فى العربية 
قولتلى هو احنا هنروح عندكم نعمل ايه وانا اقولك مش عارفة خايفة كدا و متوتره 
وانا اساسا فى الكوافير كنت برغى مع صاحبتى فى الموبايل و بنهزر و الدنيا عادى خالص 
بس اول ما شفتك والعربيات والناس وانت قمر كدا اتخضيت هو فى ايه يا جدعان 
ده انا العروسة وحالة من الازبهلال جاتلى فجاة 
واول ما فقت كان على ضحكتك وانت بتقولى انا كدا ادبست صح وكان ردى هو انا حلوة هههههههههههه
فاكر بقى اول مرة جيت عندنا البيت بعد الخطوبة جيت الساعه ثلاثة العصر ووشك احمررر جدا من الكسوف 
وتقولى دى اول مرة اجى عندكم لوحدى وانا اقولك انت خايف ولا ايه مش هنخطفك ولا حاجة
بعدها بقى بقيت بتيجى تصحينى من النوم اساسا :P بحب تصحينى من النوم على فكرة :*
نيجى بقى لاول مرة نخرج سوا اللى هو لحد اخر الشارع ده و مكسوفين نمشى جنب بعض 
واقولك مش تجرى كدا مش عارفة احصلك وتقولى طيب انجينى وانا اقولك لا اتكسف حد يشوفنا 
والدبل دى ايه طيب ما كل الناس اتفرجت علينا فى الخطوبة 
ولما عملت كدا بابا شافنا وفضلت شهر فرحان فيا وتقولى باباكى شافنا ترلالا 
بس انا بحبك بقى اووووووى جدااااااا خاااااالص 
نفسى امشى معاك فى كل البلد واقولهم ده جوزى حبيبى يا جدعااااان لقد اصبحت عروسة وكدا يعنى 
كل الحاجات دى افتكرتها وانا بحط صور خطوبتنا فى الالبوم 
وكأننا لسه مخطوبين امبارح وكأن السنة و نص اللى عدوا لسه فى بدايتهم 
وكأنى لسه بكتشف قد ايه انا بحبك 
انت مش متخيل احنا حلوين ازاى و الفرحة باينه فى الصور قد ايه 
عنينا على بعض حتى واحنا بعيد حتى واحنا بنبص فى اماكن تانية 
عقبال صور الفرح بقى يا حبيبى و تبقى احلى واحلى و يبان فيها حبنا و فرحتنا اكتر كمان
وعارف والله اكيد ربنا كاتبلنا خير فى معاد الفرح انه يتغير
انا كنت عايزة 6 اصلا علشان يبقى مميز اكتر حتى شوف
6/4/2012
6/2/2014
طيب بذمتك فى احلى من كدا .. اطلاقا :*
 على فكرة انا بعشقك 

ملحوظة على الهامش 
صورك وانت بيبى منورة الالبوم عملتلك صور بعيد عن صور الخطوبة ;)

Wednesday, April 10, 2013

شهريارى



فى الليلة الاولى التى تسبق الألف ليلة وليلة
أعلن مأذون البلدة  الامير والاميرة زوجا وزوجة
فنظر اليها نظرة اختلفت عن سائر نظراته السابقة لها
وكان صورتها فى عنيه قد تبدلت احس شيئا مختلفا تلك المرة
احس انه وصل الى السماء  بناظريه و بان الفرح على مقربة خطوة من روحه
فبادلته نظراته وكأن السماء  اضاءت له ليجتاح نورها صدره
ليدق قلبيهما فى اللحظة ذاتها
وقد بلغنى يا مولاى ان وجه الامير كان دائم الابتسام
وان وجه الاميرة قد غاب وسط  حمرة الخجل من الهيام
وان ديك الصباح قد فأجأنا بالصياح  وادركنا الصباح
مولااااااااى